Ua faamautū ai nei le filifiliga a le malo i le tofiga Ofisa Sili o le pulega o le Matāgaluega fou o Tupe Maua i le mae’a ona vavae ese le ofisa o le tiute ma avea ma se isi matāgaluega a le malo ae sa vaavaalua ma tupe maua i se matāgaluega e tasi.
O lea ua faailoa e le ta’ita’i o le malo le faamaonia e le kapeneta o le filifilia o le afioga Fuimaono Vaitolo Ofoia e avea ma Ofisa Sili muamua mo le matāgaluega o tupe maua.
O se tamalii o loo umia ni faailoga maualuluga i tomai i galuega tau tupe, ma e tofia nei o loo faauluulu iai le faamalu o faalapotopotoga tuma’oti a Samoa le SUNGO.
O se tamalii sa tauva mo le nofoa o le itumalo o Vaa o Fonoti i le fu’a a le vaega faaupufai o le Faatuatua i le Atua Samoa ua Tasi i le palota tele ia Aokuso.
Mo le silafia o tausaga e tele ua tuana’i sa iai lava le Matāgaluega o Tupe Maua sa faaigoa o le Samoa Inland Revenue, ae o fetuuna’iga o nisi o auaunaga a le malo i ni tausaga ua mavae sa tuu faatasi ai ma le ofisa o le tiute.
O lea ua toe tuu eseese ia auaunaga a le malo.
