Ua filifilia e le Rugby World Cup o lenei tausaga le susuga ia Theo McFarland e avea ma tama taalo o le Manu Samoa i le Ipu o le Lalolagi o loo faagasolo nei i Farani.
O tausaga uma lava e faagasolo ai le Ipu o le Lalolagi pe a mae’a Pool Games ona piki loa lea o tama taaalo sa iloga le faatinoina o le taaloga.
O le maualuga o le faatinoina e le susuga ia Theo McFarland o le taaloga i le taamilosaga i le Pool D o loo iai le Manu Samoa, o iina na agai iai le silasila a I latou o loo fafoeina le Ipu o le Lalolagi i le taimi lenei.
E lei ‘ela le silasila a le komiti faafoea i lea alo o le atunuu ma lana taalo mai le taaloga muamua ma Chile lea sa avea ai o ia ma tama taalo o le numera tasi i lea taaloga.
Sosoo ai ma taaloga ma Argentina ma Iapani faapea le taaloga mulimuli ma Egelani lea sa iloga ai foi le tulai mai o le loto atunuu o lea alo o Samoa i lona faatinoina o le taaloga.
E ui i le lē ausia e tatou o le sini autu o le Ipu o le Lalolagi ae sa iloga ona silasila ma maimoa le lalolagi atoa i le felelelelea’i o le Manu i le faatinoina o ana taaloga i le Pool Game.
Ua faaalia le loto faafetai ma le agaga fiafia o lea alo o le atunuu i le tapuaiga a Samoa atoa faapea ona aiga ona ua mafai ona ia ausia lea tulaga, ma o se talafaasolopito foi lea mo ia i lona olaga taalo.
Ae ina ua mae’a le taaloga a le Manu Samoa ma Egelani, na feiloai ai le susuga i le faiaoga ia Vaovasamanaia Seilala Mapusua faapea le pulega ma le ‘au atoa, na tutulu ai le faiaoga ma momoli lona loto faafetai i le ‘au atoa i le matagofie o le faatinoina o le taaloga.
Ua silamio le lalolagi atoa aemaise o le atunuu ma ua faamalieina le loto i le galuega sa faia i totonu o le malae.
Na faailoa e le susuga ia Theo McFarland lea tulaga i se faatalatalanoaga i luga o le tautua a le Radio Samoa ina ua mae’a le taaloga ma Egelani.
