O Samoa ua oo mai iai le faasologa o le tofiga o le Faa-Ao o le Iunivesite a le Pasefika poo le tofiga o le Chancellor, ma o le afioga i le Ao o le Malo, afioga Tuimalealiifano Vaaleto’a Sualauvi II, o le a faaee iai le tofiga maualuga lenei i le faauuga a le Iaumua o le Iunivesite i Samoa o loo i Alafua.
Ua faailoa e le Pule o le Iunivesite a le Pasefika ua faamautu i Samoa o Pal Ahluwalia le faatino o lea sauniga i le Aso Faraile nei, i le faauuga o le a tauaao ai faailoga eseese ma tusipasi mo le au faauu e 270. O le aofa’iga lea o le au faauu o loo aofia ai ma le to’a 27 ua ausia le faailoga maualuga o le Master in Business Administration.
Faaalia e le Pule o le Iunivesite a le Pasefika e ta’i sefululua tausaga ma oo le faasologa o le tofiga o le Faa-Ao o le Iunivesite i atunuu o le Pasefika o loo lotolotoi i le faagaioia o le iunivesite. O le afioga i le Minisita o A’oga Taaloga ma Aganuu le afioga Seuula Ioane o le a ia faatino le faaeeina o le tofiga Faa-Ao i le Ao o le Malo.
Ae i le tulaga i taumafaiga a le Iunivesite i le laumua i Samoa e siitia lana tautua i le itu i a’oa’oga ua faailoa e le Faatonu o le iunivesite le afioga Tootoole’aava Fanaafi Le Tagaloa, o le lālā i Savaii o se isi lea o manulauti i taumafaiga o loo faagasolo e siitia auā alo ma fanau aemaise le atunuu o alala i Savaii o loo mana’omia a’oa’oga faaauau.
Le tamaitai Faatonu o galuega a le Iunivesite o le Pasefika i le laumua i Alafua le afioga Tootoole’aava Fanaafi Le Tagaloa, i se feiloa’iga ma tusitala.
