Ua faamautu nei e le Komisi o Galuega a le Faamasinoga o Fanua ma Suafa, ina ua mae’a saini le afioga i le Ao o le Malo, ma ua iai foi ma le ioega a le Kapeneta, le filifilia o le Sui Peresetene o Faamasinoga o Fanua ma Suafa a Samoa, lea o le a tauave e le afioga Afamasaga Michael Soonalole o se loia.
Ua faamaonia mai e se molimau faatuatuaina lea filifiliga. O lea tamalii sa muai galue o se Malu o le Malo ma umia ai se tulaga o se tasi o sui Komesina, ma faauu foi e avea ma loia a o tautua ai i le Matagaluega o Leoleo ina ua mae’a ana aoaoga i fafo.
Na ia tuua le galuega faaleoleo, ma galue o se loia mo ni tausaga seia oo ina filifilia nei e avea ma Sui Peresetene o le Faamasinoga o Fanua ma Suafa a le atunuu, o se faamasinoga tāua tele o loo lipoi ai mataupu tau fanua faaleaganuu ma suafa matai.
O le Aso Gafua o le vaiaso asau o le a amata galue ai lea tamalii i lona tofiga Sui Peresetene pe a mae’a le sauniga o le a faatauto ai.
