E toalua tupulaga talavou o Samoa ua aofia i le toa 50 tupulaga mai atunuu o le Pasefika ua aofia ai talavou mai Ausetalia ma Niu Sila, o le a feiloai i Aukilani Niu Sila i le faaiuga o le masina nei mai le aso 29 i le aso 31 o Oketopa, i se faatasiga tele ua faatupe ma lagolago e le Malo o Amerika.
O le autu o le faatasiga o le mafuta faatasi lea o tupulaga ma i latou o loo lotolotoi i le faia o polokalame e faasaoina ai lo tatou paneta mai suiga tetele o le tau.
O se mafutaga ua faaalia e le Malo o Amerika i se pepa o faamatalaga, o le a unaia ai tupulaga o lenei faaitu o le lalolagi, e tutu faatasi e lagolago taumafaiga uma mo le taofia o suiga o le tau, ua matua afaina ai e le gata o le siosiomaga o atunuu taitasi, ae ua olopala ai ma tamaoaiga o atunuu laiti tau atiae.
O Tooa Brown ma Faauiga Kalapani, o talavou ia mai Samoa ua filifilia, ae o atunuu e pei o Fiti e toafitu ona sui ma Papua Niu Kini e toaiva. O Tonga e toafa ona sui talavou, ae o Samoa, Amerika Samoa, Vanuatu, Solomona, FSM, ma Guam e tailua sui auai. O isi atunuu e na o le taitasi o latou sui.
O le mae’a o le uluai fono a le Peresetene o Amerika ma taitai o Malo laiti o le Pasefika sa faia i Uosigitone i le vaiaso na tea nei, sa molimauina ai le tāua o le faia o se faatasiga mo taitai o Tupulaga Talavou o le Pasefika e faasoa ai o latou silafia ma iloa ia latou taumafaiga e faasino i suiga o le tau o loo faatino i o latou atunuu.
