O le taimi muamua lenei ua filifili ai le alo o Samoa le susuga ia Mark Telea i le Ipu o le Lalolagi i le All Blacks i lona tulaga o le uigi.
O ia foi sa ave iai le faamuamua a le susuga i le faiaoga o le All Blacks na te faafetoa’ia ai ‘au malolosi sa Pool faatasi ma le All Blacks aemaise ai o le sailia o le avanoa o le ‘au a Niu Sila i le Ipu autu.
O le susuga ia Mark Telea sa ia tatalaina le uluai tama na laasia le laina sikoa o le Ipu o le Lalolagi i le taaloga ma Farani lea foi e lua ana sikoa na maua ai i le uluai taaloga.
Na iai le isi ana sikoa na ia laasia ai foi le laina e pei o le taaloga ma Italia, faatasi ai ma lona malosi sa tele ina vaovaogata ai a o osofai i isi taaloga a le All Blacks.
O Mark Telea sa tele ina maitauina e le World Rugby le lelei o lana taalo i le taamilosaga atoa i lona tulaga o le uigi i autafa o le malae, faatasi ai ma lona finau i totonu o le malae e fesoasoani i lana ‘au atoa, seia oo lava i le sailiga o le siamupini.
E toafā tama sa fai agai iai le filifiliga o se tama sa pito maoa’e lana taalo i le taamilosaga atoa e aofia ai le tama taalo mai Farani ia Louis Bielle Biarrey, o le numera 10 a Aferika ia Manie Libbok, o Mark Telea o le All Blacks ma Tamaiti Williams o le All Blacks.
O le sailiga siamupini a le All Blacks ma Aferika na tilotilo ai le lalolagi atoa i le malosi o le osofai o le uigi a Telea lea toeitiiiti lava a ia laasia le laina sikoa i le tele o taimi.
O le sauniga sa faia a le World Rugby e faamae’a ai le Ipu o le Lalolagi i lenei tausaga na tauaaoina ai loa ma le faailoga faapitoa lenei mo Mark Telea o le tama pito maoa’e le osofai o lana taalo i le Ipu o le Ialolagi (World Rugby Breakthrough Player of the Year).
Manaia le faaeaea o alo ma tamafanau o Samoa.
