O le talelei ma le tala fiafia ua salalau i tama taaalo ma ‘au taitasi sa auai i le taamilosaga o le NZ SAMOA NA LUA TAG NATIONALS lea sa faataunuuina i le malae o le Centre Park i Magele i le vaiaso ua mavae.
E faapea o le taamilosaga, e ese le faigofie o lona faagasoloina toe taugofie lona resitala.
E lelei le mafutaga a tama ma teine taaalo i ‘au a tagata matutua seia oo i ‘au laiti, lelei togiga sa faaaogā e ‘au taitasi aemaise ai ua maua le avanoa e fefaasoaa’i ai le taleni i lenei ituaiga lakapi.
E malupuipuia le malae faapea le car paka i sikulaki a le susuga ia Mealamu sa galulue i aso e lua.
Ae sili ai o le silasila ma le vaavaai o ‘au taitasi i le po o le Aso Tofi sa tatala aloaia ai lenei faamoemoe i le sauniga lotu sa taitaia e le susuga i le faafegaiga ia Rev Sapati Tima ona sosoo lea ma le ava o le feiloaiga lea sa auai ai Ie Konesula o le malo le afioga ia Afemata Palusalue Faapo II i le faatāuaina o le aganuu a Samoa.
E lua aso sa faafoeina ai lenei taamilosaga o le Aso Faraile na amata ai ae taualuga i le aso Toonai na fai ai sailiga siamupini.
E 34 ‘au sa auai e aofia ai ‘au i Niu Sila nei, ‘au mai Samoa faapea ma Amerika Samoa.
O le susuga ia Li’amanaia Lorenzo Kaisara sa fai ma Fofoga o aso e lua e faafoefoeina ma faafiafia autaaalo.
I le sailiga siamupini i le vaega o tagata matutua (Master) na manumalo ai le Auckland Samoa, (2) American Samoa ma le (3) Aiga Tautua.
‘AU A TAMAITAI
(1) Auckland Samoa Red
(2) Counties Manukau
(3) Auckland Samoa Blue
‘AU FEFILOI
(1) Auckland Samoa Red
(2) Counties Manukau
(3) Auckland Samoa Blue
OPEN MENS
(1) Auckland Samoa Blue
(2) Auckland Samoa Red
(3) Counties Manukau
O le tausaga fou o lea ua toe tapena ai le komiti faafoe o lenei taamilosaga e toe faaauau ai nei taaloga i le taimi lava faapenei.
Ua tele lona sao tāua i alo ma fanau o Samoa auā e ese foi le faatinoina o lenei taaloga.
