Ua tuu avanoa le faamasinoga i le loia o loo tula’i mo se pulenuu ma se matai e silasila ai i faila o faamaumauga a leoleo i moliaga o le saini faamalosi o pepa saofa’i ma ave e lesitala ae e le’i faia se nofo, ona faato’ā tuuina atu ai lea o ni tali a i la’ua ua molia e leoleo.
O Tapagai’a Taupega Amituanai Foa e 67 tausaga o le soifua o Lalomanu, ma se tasi sa avea ma Faipule o le Palemene ma filifilia o se Minisita o le Kapeneta i se paea’iga a le Palemene ua mavae, le afioga Manu’alesagalala Enokati Pelo ua 64 tausaga o le soifua o Vaitele, o loo molia i le mataupu lenei.
I le pepa o faamaumauga a leoleo i le solitulafono o loo faailoa ai o le aso 21 o Oketopa o le tausaga na te’a nei 2023, na sainia ai e Tapagai’a Taupega le pepa saofa’i i lona tulaga o le pulenuu o se gaoioiga na ia faia ma lona silafia e le’i faia se saofa’i.
O le aso foi lea na taulimaina ai e Manu’alesagalala Enokati Pelo le pepa saofa’i i le faamoemoe e ave e lesitala ma faatino ai le gaioiga o le faia o se faamaumauga e solitulafono.
O le Aso Gafua o le vaiaso a sau e toe valaau ai le mataupu lenei, lea o le a iloa ai ni tali a i la’ua ua molia.
