I le tulaga lava o toe faasee o le vaega o laisene taavale i le Pulega o Felauaiga ile Laueleele mai le Matagaluega o Leoleo, na teena ai e le Minisita Olo Fiti Afoa Vaai le saunoaga a le Sui Faipule a le itumalo o Falelatai ma Samatau, Lupematasila Tologata Tile Leia e tusa ai o lenei vaega.
“A ua talafeagai foi lenei taimi i le LTA auā ua tau leai foi ni a latou galuega e faia, tuu atu iai le laiseneina o taavale mo lenei foi taimi.”
Na tali le Minisita, “E faanoanoa lava i le saunoaga, mo saunoaga tuulafoaia i le leiloa tilotilo i le tautiga o le aufaigaluega.
“Tele ia o galuega ia e gafa nei ma le LTA, lea foi e tau tilotilo atu i le nusipepa a le Observer ua faitio mai i le tuai o le respond a le LTA, EPC ma le vaega a le Suavai i le mea sa tulai mai i lou itumalo lau Afioga.
“Ae ou te talitonu a’u o lena e te molimau lau Afioga i le tulaga e lei momoe le aufaigaluega i le po atoa i le toe faafoiina o auala e femalagaai ai le atunuu, o le suavai taumafa o le itumalo.
“Lea na oo foi ia te au, na ou tilotilo lava i le po atoa o galulue, ao lelei o galulue ae ese lo’u faanoanoa i ia saunoaga faapea e leai ni mea o faia.
“Tau tuutuu loloto le tofa, pau a na o la’u fautuaga, fetuutuunai le tofa e le ni pologa tagata faigaluega ia, o lea e galulue i le ao atoa ma le po ma soo se taimi lava.
“E oo a i taimi e oatu ai onanā ta so’a i lalo poumuli o loo galulue lava i le taimi lena e faalelei le auaunaga i le atunuu, ae faamāmā ia le sausau i lau afioga i le Sui Mamalu.”
Na toe fono faapipii ai le saunoaga a le Fofoga Fetalai i lea lava mataupu.
“O tatou lava o tamā o le atunuu, tatou te faamalumalu foi i galuega a le aufaigaluega, mea lea e fuafua foi a tatou saunoaga ma alolofa i le aufaigaluega ma tuuaiga faapea ona e le taugofie, ia alofa le sui Mamalu ia felagolagomai la tatou galuega.”
Toe saunoa Lupematasila e le o le agaga lea o lana faamatalaga.
“Ou te le o fai atu o momoe le aufaigaluega e leai ni a latou galuega o faia, o le vaega lea sa taumafai atu ai se faamatalaga ona a e silasila i le paketi o loo iai nei, e tau le o iai ni development tetele o iai.”
Na fautuaina ai e le Fofoga Fetalai le Sui Faipule ina ia faasee ese ma lea mataupu ona o loo aafia ai le aufaigaluega ae saunoa i le tulafono taufaaofi.
