O le pasi aoga ma le loli lea na feto’ai i Kuiniselani i le vaiaso nei ua faailoa mai e leoleo e toa 10 tamaiti aoga na manunu’a ai ma le tagata matua e toatasi.

O le pasi sa tumu i tamaiti aoga ma fai mai lipoti sa faapaka le pasi i le pito o le auala le M1 i Beenleigh ae soso’a atu ai e le loli lea poo le 9.40 i le taeao ananafi. 

Fai mai e toa 55 tamaiti aoga sa i luga o le pasi ma le aufaigaluega e toafā mai le Calamvale Community College sa agai atu i le Gold Coast mo se tasi o polokalame a le aoga.

Ta’ua mai e le Queensland Ambulance e toatasi le tagata e manu’a tigaina ma ua ave atu i le falemai o tamaiti i Kuiniselani atoa ai ma isi tamaiti e toa 9 na manunu’a foi.

Fai mai le lipoti lata mai o loo faasolo ina manuia i latou uma ia ae o loo faia le suesuega a leoleo.