E silia ma le $50,000 tala Niu Sila le fesoasoani tupe a tagata Atu Kuki e fesoasoani ai ia Niu Sila ma ona aafiaga mai le afā o Gabrielle.
O le afā o Gabrielle lea na fasiotia ai le toa 11 ma matuai tigaina ai le North Island i le masina o Fepuari ma e oo mai lava i le taimi nei o lea lava o loo toe tau faatulai le toatele o aiga ona o mea na faaleagaina.
E lei nofoa’i ai tagata Atu Kuki ma o lea na faia ai foi la latou sailiga seleni ma maua ai le $52,892 ma ua mae’a tuuina atu i le Hai Komesina o Niu Sila o loo i Rarotonga le siaki.
A fua i le na o le 18,000 tagata o loo nonofo i le Atu Kuki o se tupe tele.
Na talia ma le agaga faafetai e sui o le malo o Niu Sila na tauaaoina le alofa tulai o tagata o le Atu Kuki.
