Ua folafola le Malo o Ausetalia o le a faaauau pea lana fesoasoani o le a’oa’oina o tagata faigaluega i Samoa i tomai ma agavaa i tautua i galuega, i le soifua maloloina ma le saogalemu, aemaise o tomai i galuega faatekonolosi.
le faauuga o tagata faigaluega e 116 ua maua tusipasi mai le a’oga o matata eseese a Ausetalia i Samoa, na faailoa ai le faaauau pea o lea fesoasoani tāua e le sui o lea Malo i lo tatou atunuu.
O le kolisi o matata eseese faapitoa a lea Malo o loo aooga ai ma nisi o tagata mai atunuu eseese o le Pasefika.
O le au faauu ua maua tusipasi e toa 86 ua faaiuina a’oa’oga i le tausia o le soifua maloloina ma le saogalemu faapea tomai e silafia ai faitau ma malamalama i le gagana e faaaoga i auaunaga faatekonolosi.
E 29 ua faauu i le mae’a o a’oa’oga i tomai tau i le vaaia lelei o alavai ma galuega palama ma o i latou ia mai le motu i Salafai.
O le tāua o le maua o tusipasi i ia tomai o le a fesoasoani malosi i auaunaga eseese o loo ofoina e le Malo ma pisinisi tumaoti, i le toe fausia o le tamaoaiga o Samoa mai aafiaga o le faamai Koviti-19.
Faaalia e le Faatonu o le aoga o matata eseese a le Pasefika i Samoa le tofa Lagaaia Lealiifano Easter Manilla Silipa, o le ofoina o ia a’oa’oga o le a unaia ai pea le ofoina atu o avanoa mo i latou e fia maua ia tomai ina faaosofia ai pea moegaluaga i le lumanai mo nisi alii ma tamaitai o le atunuu e fia maua ia a’oa’oga e maua ai a latou galuega.
