O le fesoasoani tupe o loo tuuina mai e le Malo o Niu Sila e tauala mai i le faalapotopotoga o Pisinisi Tuma’oti i le atunuu lea ua faalauiloa ai mo pisinisi laiti aemaise i atina’e ina ia mafai ai ona toe faaleleia.
Saunoa lē ua faauluulu ai lenei poloketi John Lemoa e tusa ai o le faamautuina o lenei fesoasoani mo nai a tatou tagata faipisinisi.
“E lima vaega o loo auau ai lenei fesoasoani o le atina’e fou ua fuafuaina mo le pisinisi, faalauteleina o le tamaoaiga o le pisinisi, galuega e aofia ma manuia uma ai tagata lautele o le pisinisi, o galuega oloo fuafuaina e faaitiitia pe foia ai aafiaga o suiga o le tau i le pisinisi ma galuega faamāmā avega mo le sailia o nisi fesoasoani tupe mo le atina’eina o le pisinisi e pei o le talosagaina o ni nonogatupe.
“E leai se tau aofa’i atoa ua faailoa mai o le grant mo Samoa, ae o loo vaevaeina e fa’atatatau i le numera o tagata faigaluega.”
Mo pisinisi e toalima le fuainumera o ona tagata faigaluega e mafai ona maua le fesoasoani tupe e tusa lea ma le $8,200, 10 tagata faigaluega e oo atu i le $16,500, 20 tagata faigaluega e mafai ona faamatuu ai le seleni $33,000 ma le pisinisi e oo atu i le 50 tagata faigaluega e maua le $50,000.
Na ta’ua foi e Lemoa e le o iai se taimi faatapulaa mo talosaga ma e tatala lava le avanoa mo se taimi umi.
O aiaiga o le faamatuuina o lenei fesoasoani e muamua lava nisi o vaega e ao ina silafia a o lei tuuina se talosaga e pei ona ta’ua i taiala o le poloekti e ao lava ina ia iai se laisene o le pisinisi ma mae’a lesitala i totonu o le atunuu, e tatau ona lē sili ifo ma le 50 tagata faigaluega, e ao ina faia lafoga, ia ao foi ona iai ni tupe tuua o ni nonogatupe ma nisi o vaega.
O lenei polokalame o loo pulea ma vaaia e le Business Link Pacific (BLP), ua faatupeina e le Matagaluega o le Va i Fafo ma Fefaatauaiga a Niu Sila, ae o loo faamatuu mai e le DT Global ma o loo galulue faapaaga nei ma le Faalapotopotoga o Pisinisi Tuma’oti.
O lenei foi polokalame e aofia ai ma nisi o atunuu o le Pasefika.
