A o faagasolo pea nisi o galuega a le Ofisa o Faamaumauga i le aoina o faamaumauga o tupe faaalu a aiga ma le tulaga o le soifuaga poo le Household Income and Expenditure.

O lenei suesuega ina ia mafai ona silafia e le Malo o Samoa tulaga o loo moomia ai e le atunuu le fesoasoani.

I pepa o faamatalaga mai le Ofisa o le Sooupu, o le fesoasoani lenei e aofia ai laptops, tablets ma nisi o polokalame faatekonolosi e fesoasoani i le aoina ai o nei faamaumauga.

O le Sui Komesina a Ausetalia i Samoa nei Claire McGeechan na tauaaoina lenei fesoasoani mo lenei faamoemoe.

“O le agaga fiafia i le Malo o Ausetalia e tuuina le lagolago i lenei vaega o le Malo o Samoa e ala i lana auaunaga o loo agai sa’o i le aoina o faamaumauga i le itu tau i le tamaoaiga o le atunuu.

“Ma o faamaumauga o loo aoina o le a mafai ai ona faia faaiuga talafeagai ma faiga faavae mo le soifua manuia o Samoa ma ona tagata.”

E $1.2 miliona le aofai o le lagolago tau tupe a Ausetalia na faatulaga mo lenei auaunaga, faatasi ai ma meafaigaluega na tuuina atu ai se vaega o le aofa’i o masini ma polokalame faatekonolosi e $140,000.

Na faafetaia e le Ofisa Sili o Pulega, Leota Aliielua Salani lenei fesoasoani ua taulimaina e le Ofisa a o faagasolo ai la latou suesuega.

O lenei fesoasoani e tauala mai lea i se tasi faigapaaga a le Malo o Ausetalia ma Samoa i le faatupulaia o tamaoaiga ma ana atina’e.