A o feagai nisi o fanau ma suega faaiu o lenei tausaga faaleaoaoga o se tasi lenei o polokalame ua faaigoaina o le Imagine Science sa iai se fesoasoani tele i nisi o fanau aoga i mataupu o le Faasaienisi.
O le Aoga Tulagalua a Vaimoso e pei ona tuuina i faasalalauga i upega tafailagi a le Imagine Science Samoa sa faatino ai le toe faamanatu i fanau aoga vaega eseese sa aoaoina i lenei mataupu e fesoasoani ai a o tapena ai i suega faaiu.
O le fesoasoani sa agai tonu lea i le Vasega 7 ma le 8 ma na amata mai lea i le amataga o le masina nei e pei ona iai nisi o sui mai lenei faalapotopotoga e aoaoina ai fanau o le Vasega 8 ina ia mafai ona fesoasoani ai i fanau o loo i le Vasega 7.
O le auga ma le faamoemoe o lenei polokalame ina ia mautinoa ua lava tapena fanau aoga mo suega aemaise lava i le mataupu lenei o le Faasaienisi e ogatasi le fesoasoani lenei ma mataupu o loo i le silapasi a le vasega.
O loo mafai ai ona maua le tomai i fanau aoga e faasoa ai vaega eseese ua mae’a ona aoaoina ai e lenei polokalame mo nisi o fanau aoga o moomia le fesoasoani i le mataupu o le Faasaienisi a o sauni ai mo suega.
O loo faagasolo pea nisi o polokalame a le Imagine Science Samoa e mautinoa ai le siitia o le tulaga o le malamalamaga o fanau aoga i lenei mataupu o loo aoaoina.
