O tala i faaletonu o le atinae o tagata tafafao i Samoa ao malomaloa le pipisi o le faama’i Koviti-19 sa iloga ona tomua i tala o faaletonu tau tupe ona ua leai ni tagata tafafao e toe afea le atunuu ina ua tapunia tuaoi faavaomalo.

O tagata faigaluega ua faamalolo, o faletalimalo ma fale apitaga tu matafaga ua tutū na o fale pei o ni nofoaga o agaga leaga auā ua lē toe iai nisi e pisapisao i tafaoga ma malologa.

O lea ua toe tulai mai lea atinae i se tulaga lelei i le tuanai o ia faaletonu ae peitai e moomia le saga faaleleia ina ia siitia pea ma tafe atu ai seleni mo galuega fai o le tamaoaiga o Samoa.

Ua aapa mai ai lima fesoasoani o le malo o Ausetalia ma lana faasoa tau tupe ua foai le tasi le miliona ma le valu selau afe tala tupe Samoa ($1.8miliona) i le pulega o tagata tafafao a lo tatou atunuu, e fesoasoani ai e faatino ni aoaoga i le tomai i le maketiina o le tatou atunuu i le sini autu ia faatosina mai tulisi e toatele mai Ausetalia e afea Samoa.

E pei ona silafia o le tasi lea o atunuu o loo toatele tagata tafafao e malaga i lo tatou atunuu ma tafafao ai.

E faaopoopo iai ma le toatele foi o tagata tafafao mai le atunuu o Niu Sila.

Ae i le tauaaoina o le fesoasoani na faaalia ai e le Komesina Maualuga o Ausetalia i Apia le susuga Will Robinson, na ia faailoa ai le soosoo tauau pea o lona Malo i lea atinae taua o le tamaoaiga ma le faanaunautaiga ia tupu ma ola le atinae o tulisi poo tagata tafafao.

O le Taitaifono o le komiti faatonu o le pulega o tagata tafafao le faletua afioga Tauiliili Alise Stunnenberg na fai ma sui o le minisita ma le Malo aemaise le pulega o tagata tafafao e momoli le faafetai tele i le sui o le Malo o Ausetalia i le agalelei e ala i le foai tupe.

O le malo o Ausetalia o se tasi o paaga totino a le Malo o Samoa o loo galulue faatasi i soo se taumafaiga o le atinae o le tamaoaiga o le tatou atunuu, aemaise foi o manaoga o Ausetalia e manaomia ai le lagolago a Samoa i tulaga faavaomalo.