E ese mai le sese ona faamaumau o palota e le komisi o faigāpalota, o lea foi ua toe upuia i le faaaogā o le Manurewa Marae e avea ma falepalota, poo le fale o loo Pule Sili ai le sui o le pati a Maori Takutai Moana Kemp lea ua pale mai i le tofiga faipule o le itumalo o Tamaki Makaurau.
Na o le 4 palota lea o loo sili ai Takutai i le sui momo’e o le Labour, Peeni Henare ma o se tasi lea o itumalo o loo toe faitau nei palota i le mae’a faatalosagaina.
O faitioga a nisi ua toe faaoo i le ofisa o faigapalota o le faia lea o nisi o polokalame e aofia ai ma le tufatufaina o meaai i le falepalota.
Ua faaupuina ai e nisi ua pei meaai o se mailei e sue ai nisi palota.
Peitai o loo iai foi le finau, o le masani lava lea a soo se marae o le faia o meaai.
Ae mo le ofisa o faigāpalota, o lea ua fesiligia pe na faafefea ona faaaogā lenei marae ae o lea e Pule Sili ai le sui tauva o loo toe momo’e i le palota.
E oo mai i le taimi o tala fou, e leai se tala tele mai le komisi o faigāpalota i suesuega o loo faasolo.
