Ua faaalia lautele se finagalo o le taitai o le pati faaupufai e puipuia aiātatau a tagata ma ia ta’u solitulafono ai le faaiuga a le Palemene ua pasia ai teuteuga o Tulafono tumau ma suia ai le faipule o lana vaega faaupufai e tauaveina le tofiga taitai o le Itu agai.
I le feiloaiga ma nisi o tusitala i le Aso Toonai na tea nei, na faailoa ai e le susuga Tuilaepa L Sailele Malielegaoi, e le gata ina aiaina e le faaiuga o la aiātatau ma le faipule o Faleata 3, ae o lana matau o se faaiuga ua soli ai aiaiga o le Tulafono faavae e faasino i le faaali saoloto o ni o la manatu, i mataupu e fautuaina ai le Malo ma le Palemene.
O atugaluga o Tuilaepa i le aafia o o la aiātatau i le faaiuga a le Palemene ua pasia ai teuteuga o Tulafono tumau, sa fesiligia foi e nisi o faipule o le Itu agai a o talanoaina le lipoti a le komiti o Tulafono tumau, mataupu tau faigapalota, ma talosaga o tofiga faalefaavae e taitaifono ai le sui fofoga fetalai.
O tali mai le itu a le Malo e pei ona sa saunoa iai le Minisita o Faatoaga ma Faigafaiva, na faailoa ai o aiātatau saoloto e faaali ai manatu ma lagona, e iai ona tuaoi e muta ai.
Le afioga i le Minisita o Faatoaga ma Faigafaiva i sona finagalo tali i sui faipule o le Itu agai na faitioina teuteuga o Tulafono tumau ma le lipoti a le komiti ua pasia le latou fautuaga i teuteuga fou ua ioeina e le Palemene.
