A o faasolo mai pea faamaumauga ma faamatalaga mai le soifua mālōlōina e tusa mai le maua o tagata ua aafia i le misela i totonu o Ueligitone, o lea ua fesiligia e nisi o mātua, pe aisea e lē mafai ai ona fai tuipuipui o fanauiti e i lalo ifo o le 1 le tausaga le matua, se’i vaganā ai o le a malaga atu i nisi atunuu?
O se popolega o nei mātua i le aafia ai o a latou fanau, ae e lē ave iai le faamuamua ma le faamamafa i le soifua mālōlōina.
Na tali le Auaunaga o le Soifua Mālōlōina le Health New Zealand, e le’i oo Niu Sila i se tulaga ma’ale’ale, poo se tulaga pagatia e ono moomia ma tatau ai ona fai loa tuipuipui o pepe poo fanauiti.
Faaalia e le tasi o tinā mai Lower Hutt, e le’i mafai ona fai se tuipuipui i le falema’i mo si ona alo e 5 masina ae oo atu i le $260 le tau e fai ai le tuipuipui o le MMR i falema’i tuma’oti.
E ui i se taugatā ae na faailoa e lea tinā na ia faia lava ona o le umi ona faatalitali i le 12 masina e faato’ā fai ai lea tuipuipui.
O le manumanuga i le soifua ma le ola o si ana tama ina ne’i aafia i le misela.
Faaalia e le tasi o tinā, e le’i talia e lana foma’i le talosaga mo le faia o le tuipuipui a si ana tama e 7 masina le matua, ma le tali na tuuina atu e na o ē (fanau) o loo faamoemoe e faimalaga i fafo atu ma le atunuu.
Ona o ia tulaga ua faailoa ai e le to’atele o mātua e leai se vaai mamao o fuafuaga ma ta’iala a le auaunaga, aemaise i le lē taga’i i tulaga o le pepesi o le faama’i i totonu o Niu Sila.
Puna o Faamatalaga: https://www.rnz.co.nz/news/national/577260/its-a-tad-short-sighted-parents-concerned-measles-vaccine-not-a-priority-for-babies
