Ua faaalia le finagalo o le Tamaitai Palemia i le fonotaga a le Palemene i le aso ananafi e faatatau i le vaega o Taaloga i le atunuu.

Sa faailoa e Fiame o le tasi lenei o matagaluega faaopoopo e pei ona vavae ese mai ai mai le Matagaluega o Aoga.

Na faailoa e Fiame e tele tupe galue a le Malo o loo tuuina i totonu o le vaega o Taaloga, ma o le malaetaalo i Faleata le tasi o faailoga.

Sa ia faailoa foi o le tele o ‘au masii i totonu o le tausaga o le tele foi lea o tupe e tuuina atu iai e le Malo.

E ui i le tele o tupe galue e tuuina atu ae na faailoa e le Tamaitai Palemia e lē o mafai lava ona atinae i lona atoatoa taaloga i le atunuu.

O loo vaaia lea tulaga i le tele o ‘au masii e filifili mai fafo tagata taaalo ma fesiligia ai le mea o loo tupu.

Faailoa e Fiame o le tulaga lava ia e faaalu le tupe a lo tatou malo ma le faamoemoega e atinae ai lava fanau a lo tatou atunuu, peitai e lē o le tulaga lea o loo iai.

Sa faatusa atu e le Tamaitai Palemia lea tulaga i atunuu tuaoi o Samoa e pei o Fiti, e tele malaetaalo e vaaia lava e taaalo tagata Fiti e ui e iai foi luitau i pulega ma isi faafitauli, peitai o Samoa e lē o tupu ai lea tulaga ma ua fesiligia ai nei poo fea le atinae lea o loo faaalu iai seleni a lo tatou malo pe afai e aumai fafo e fai ma sui o le atunuu i faalagamaea a le lalolagi. 

Sa ia faailoa foi o le isi atinae pe a mafai ona maua pea taaloga e talimalo ai Samoa e faaaogā iai malaetaalo sa sasaa atu iai tupe e tele ina ia toe maua mai.

Ta’ua e le Tamaitai Palemia e tupu lea tulaga pe a pulea lelei ma iloa e iai nisi o itu lelei e tupu mai taaloga e pei o le malosi faafouina ma le soifua maloloina lelei.