Ua lipotia i le asō i le One News le fesiligia e le alii taalo Brandon Smith pe faamata o le faaaofia ai o Joseph Su’aalii i le Wallabies o le a faaleleia ai le latou taaalo.

E pei ona silafia ua faamaonia mai e le Rugby Australia ua sainia se maliega ma Su’aalii e tolu tausaga e aofia ai se vaegatupe pe ā ma le $1.6 miliona i le tausaga, o lona uiga o le a avanoa ai Su’aalii e taalo mo le Waratahs i le Super Rugby, aemaise le Wallabies i le malaga taamilo mai a le Liona a Peretania ma Aialani i le tausaga fou faatasi ai ma le Ipu o le lalolagi i le 2027.

O le taimi nei o loo tulaga fitu Ausetalia i le faatulagana o ‘au a le lalolagi i le lakapi ae o le faamatalaga a Smith ua faia ua ia ta’ua ai e fiafia i le taleni a Suaalii ma le tulaga ua iai nei peitai o le uigi lea mai le Rooster ma le $1.6 miliona ua sainia e lē fesoasoani e faamalo ai le Wallabies i le All Blacks ma sa tatau ona faaaoga tatau lea vaegatupe i le atinaeina o le lakapi.

E le o ta’ua i le lipoti se faamatalaga a Su’aalii ae fai mai Sam Walker le ’afa a le Roosters o Su’aalii o se tagata taalo maoa’e ma e pule lava ia i le mea e manao e fai.

O le sau ai tua o lenei lipoti i le vaiaso talu ai, atonu sa avea foi o se tala faanoanoa mo le lakapi liki a Samoa ma lana ‘au le Toa Samoa e pei ona sa taalo ai lenei alo o Samoa i le taamilosaga o le Ipu a le lalolagi i le tausaga talu ai.

Auā o le see atu o Su’aalii i le lakapi iuni mo le taalo ai i le ‘au tele a Ausetalia, o lona uiga ua lē toe avanoa ai mo le ‘au a Samoa.

Ae pei ona ta’utino ana uo lakapi e pei o Smith ma Walker, o le filifiliga a Su’aalii o se itu e pule ai lava o ia, aemaise o le naunautaiga a lenei alii talavou e galue mo le tausiga o lona aiga ma i latou e pele ia te ia.

Peitai e iai foi nisi iloga i le lalolagi o le lakapi a Ausetalia, ua faaleo lo latou lē fiafia i le faaiuga ua faia e Su’aalii ma manatu ai afai o le faaiuga lea a Su’aalii, ua tatau loa ona alu ese nei ma le NRL nai lo e tau faatali se’i uma lana konekarate ma le Sydney Roosters i le 2024.

Ua māua foi i lipoti o le seleni ua ofoina e le lakapi a Ausetalia e totogi ai Su’aalii mo lana konekarate e taalo ai mo le Wallabies le $1.6 miliona i le season ua tulai mai ai o ia se tasi o alii lakapi ua sili ona maualuga lona totogi i le lalolagi.

O se faaeaea foi lea mo le igoa o lona atunuu o Samoa, ona e maoa’e le tulai mai o lenei alii talavou i lona foi tomai tau lakapi, aemaise se totogi maoa’e ua ofoina i ai e se atunuu e taalo ai, semanu ua na o ia o se tama talavou mai se tupuaga i se atunuu laititi e pei o Samoa, ae o lea ua sili atu ona maoa’e se totogi ua ofoina i ai e se atunuu e toatele foi ona tagata iloga i le lakapi,

E pei foi ona silafia o Joseph Su’aalii na ave foi i ai le faaaloalo a lona aiga i Samoa ina ua malaga atu faatasi ma le latou ‘au le Toa Samoa ina ia feiloai i le atunuu i le mavae ai o le latou taumafaiga mata’ina i le taamilosaga o le Ipu o le lalolagi i le lakapi liki i le tausaga talu ai 2022.

O le faaaloalo lea na faaee atu i ai le suafa matai Anavaotaua e aiga o mātua o lona tamā i afioaga o Satitoa i Aleipata ma Leoto i le Vaimauga.

O se tala faanoanoa pe afai o le a lē toe avanoa lenei alo o le atunuu e taalo mo le Toa Samoa, peitai o le tulai mai o le maoa’e o se totogi ua faatulaga ai lana lakapi e Ausetalia, le $1.6 miliona i le season, o se isi lena auala ua atili faalauiloa ai lava Samoa i le lalolagi, i le maoa’e o le totogi ua taalo ai lenei alo talavou o Samoa, e lei atoa se 21 tausaga o lona soifua, le Afioga Anavaotaua Joseph Aukuso Su’aalii.