O le asō e feiloai ai taitai o le National, ACT ma le New Zealand First i Ueligitone, a o iai i le vaiaso lona lua o talanoaga o le osiga o le isi faigamalo a Niu Sila.
E iai le talitonuga e tusa ma lipoti, o lea lava e lei feiloai faafesagai uma taitai nei e tolu i totonu o le potu e tasi.
O se aso tāua tele ona afai ae fia auai le Palemia filifilia o Niu Sila, Christopher Luxon i le fonotaga a le Asia Pacific Economic Cooperation poo le APEC lea e faia i San Francisco i Amerika i le vaiaso nei, o lona uiga e tatau ona oo atu a taeao ua iai se maliega.
Ae i molimau a Luxon ananafi, o lea o loo sologa manuia feutanaiga i le va o ia ma taitai o le ACT, David Seymour faapea le New Zealand First ia Winston Peters ma o lea foi na talanoa i le faaiuga o le vaiaso faatoa uma atu.
Ae i le faigamalo tausi a le Labour lea lava o loo ia vaaia pea i le taimi nei, o lea ua toe faaopoopo le umi seia maua se faigamalo.
