Ua faia se saunoaga a le Palemia o Niu Sila mai le nofoaga o loo faataunuu ai le faaaliga o tu ma aganuu a aoga le Polyfest i Aukilani.

Fesiligia e le autusitala le alii Palemia i sona finagalo i le faamoemoe lenei o le Polyfest, fai mai le Palemia o le Polyfest o se faamoemoe tāua tele e fesootai ai tagata aemaise foi ma le malo ma ua faamaonia lea tulaga i le tele o le mau faalapotopotoga o loo avea ma vaega o lenei faamoemoe ma faailo o loo aofia ai i totonu o le nofoaga o faia ai le Polyfest.

Na fesiligia foi i le tulaga o iai maota gasegase ma auaunaga i le taimi nei, faailoa e le Palemia o le tulaga lava lea e iai falemai aemaise o le aga atu i le vaitau o le taumalulu.

Fai mai le Palemia o loo galulue pea i lea mataupu ma o loo iai foi suiga o loo maitauina i lea auaunaga.

I le tulaga i aoaoga ua ta’ua ai e le Palemia e iai vaega o fetuunaiga ua faia i le mataupu o feutanaiga i le va o le asosi ma iuni a faiaoga ma le matagaluega ma o le tulaga lelei le talanoa pea ma fesootai.

E maeu foi le matagofie o faafiafiaga ma sao o aoga sa faatino i le Polyfest i le asō ma sa faasalalauina tuusao foi e le Radio Samoa.