O loo i Samoa nei Dr.Musonda Mumba o le Failautusi Aoao a le Ramsar Convention poo le maliega i laufanua vailaloa, e faatino nisi o fonotaga ma le Matagaluega o Siosiomaga ma ana paaga galulue e faatatau lea i le faasaoina o laufanua vailaloa i Samoa nei.
O Samoa o se tasi o atunuu o loo aofia ai i lalo o lenei maliega talu mai le tausaga 2005, ma ua tele ina ausia nisi o faamoemoega tāua e patino i lenei maliega e pei ona iai laufanua vailaloa e lua i le atunuu e aofia ai Lanutoo ma le Pupu Pue.
I faamatalga mai le Matagaluega, o le polokalame o fonotaga a le Failautusi ma le Minisita faapea ai ma le Pule Sili o le Matagaluega o Siosiomaga e aofia ai faatalatalanoaga i polokalame faataatitia o le maliega lenei ma lona aafiaga tāua ia Samoa ma atunuu o le Pasefika.
O nisi o mataupu o polokalame o laufanua vailaloa i le oceania ma matafaioi o loo galulue ai mo le puipuia lea o nei laufanua vailaloa, ma o se tasi o vaega o lenei faamoemoe o le asia lea o le faasao o le togatogo i Moataa lea o loo silasila iai e avea ma laufanua vailaloa i le lumanai.
O nei vaega uma o le asiasiga a Mumba i Samoa ua ia maitauina ai le tiute tauave a Samoa e tauala atu i le Matagaluega o Siosiomaga, i le faaauauina lea ona mataituina nei faasao auā lona malupuipuia ai e tusa ma vaega o loo i lalo o lenei maliega.
