O le masina ua mavae atu na mae’a ai le tautua a Jorn Sorensen o se Resident Representative poo se Sui o le Ofisa o le Polokalame o Atinae a Malo Aufaatasi i Samoa nei le United Nations Development Programme (U.N.D.P.) ina ua mae’a le fā tausaga i le tofi.
O le aso ananafi na tuuina aloaia ai tusi taualoa a Aliona Niculita i le Afioga i le Palemia o Samoa Fiame Naomi Mataafa e aloaia ai le amatalia o lana auaunaga.
I pepa o faamatalaga mai le U.N.D.P. na faailoa ai e Fiame o le agaga fiafia o le a galulue faatasi ai Niculita ma lona ofisa ma le Malo o Samoa e ala lea i nisi o polokalame mo le agai i luma e aofia ai fesoasoani i gaioiga i suiga o le tau, o le unaia o le sao o tina ma tamaitai, tetee atu i sauaga ma isi.
Saunoa Niculita, “O lenei tofiga o loo iai le naunautaiga o le a mafai ona matou galulue soosootau’au ai ma le Malo o Samoa, o vaega tuma’oti ma sosaiete eseese o nuu ma afioaga ina ia mafai ona lagolagoina faamoemoega a Samoa e ala i ana atinae faaauau ma ia saogalemu mai suiga o le tau o loo iai nei.”
A o lei malaga mai i lona tofiga fou na galue o ia o se Sui Lagolago i Pakistan ma e silia ma le 25 tausaga o galue o ia i tomai ma agavaa i atinae.
O le ofisa lenei a le U.N.D.P. sa faavaeina i Samoa nei i le 1979 e le gata ina tuuina le auaunaga i Samoa ae faapea ai foi nisi o atunuu i le Pasefika e aofia ai le Atu Kuki, Niue ma Toelau.
