O le polokalame ua ta’ua o le Young Pacific Leaders o loo agai lea i tagata Pasefika e faasoa ai i mataupu e aofia ai aiātatau, o le aofia o tagata uma ma isi ma o loo i Samoa nei mo lenei vaiaso e faatino ai nisi o aoaoga ma faatalatalanoaga.

O le taeao analeila na amatalia ai i se ‘ava o feiloaiga e faafeiloai aloaia ai sui e 37 mai atunuu 17 o le Pasefika na filifilia mo lenei polokalame.

Na saunoa ai le Pule Sili o le Matagaluega o fefaatauaiga ma le va-i-fafo Afioga Peseta Noumea Simi ina ia faamanatu i sui auai le tāua o lenei avanoa auā le sailia ai o fofo e foia ai mataupu o le a folasia i lenei polokalame.

“O le aofia o tagata uma e lē o le vaai lea i le tutusa o tagata uma ae o le silasila i le tutusa o a tatou tali e tali atu ai i faafitauli o loo feagai ma soo se tagata soifua ma amanaia.

“O outou o taitai o le lumanai, o le taimi nei e amata atu ai la outou auaunaga faataitai ina ia mautinoa o loo faatali mai se lumanai manuia mo o tatou tagata.

“O lenei polokalame e faatāua ai soo se tasi e faaleo ma faasoa ona manatu ma lagona i mataupu o le a talanoaina e mafai ai ona avatu fesoasoani a nisi o sui auai e talafeagai.”

O nisi o mataupu o loo faailoa e Peseta e aofia ai le siosiomaga ma suiga o le tau e pei ona mamafa ai le tele o fonotaga a atunuu o le Pasefika e ala i le sailia lea o fuafuaga tatau e puipuia ai ona tagata a o vaaia ai le tele o suiga o le tau o loo tutupu i lenei vaitau.

E tolu aso o le a faagaasolo ai lenei polokalame o loo faafoeina lea e le Malo o Amerika.