O le masina o Me o le tausaga nei na faatautaia ai e nisi o tusiata iloga i le atunuu se faaaliga e faalauiloa ai galuega a lo latou Faiaoga ia Ernesto Coter mai Italia lea sa aooga ai i le Aoga Tusiata i Leulumoega Fou.
O le aso ananafi na feiloai ai loa lenei Faiaoga ma se tasi tusiata iloga foi lona sao i le atunuu ia Lalovai Peseta ma lona aiga i lona maota i Lake Como i Italia talu mai le 26 tausaga ua mavae.
E pei ona iai tusitusiga a Peseta i upega tafailagi, o se fiafiaga tele lea ua maua le avanoa e feiloai ai ia Coter.
“O se faamanuiaga mo a’u ma si a’u manamea ina ua maua le avanoa e feiloai fiafia ai ma Coter ma fautuaga na tuuina mai mo maua a o feagai ai ma le tautuaina o le atunuu e ala i le ma taleni tusiata e lē gata ia i ma’ua a o avanoa o loo lagolagoina ai i latou o loo tau atiae i lenei taleni.
“Ana tele ni tupe ua ma toe aumaia i Samoa lenei tamā ona e tele lava lona sao aemaise o lana fesoasoani i lenei taleni mo Samoa.
“O talanoaga lava e lē uma i le olaga o Coter i le aoga sa ia amataina i le 1987 lea o loo iai lava i le taimi nei i Leulumoega aemaise lava ia i matou o ana tama fanau sa ia aoaoina i le aoga.”
Ta’ua e Peseta o loo faaauauina pea lava le galuega lenei a lana Faiaoga e ala i le tusiaina o ata mo le isi ana faaaliga ma vaavaai ai i ana galuega o loo faatino.
“Pe ana faapea foi e lē oo mai lenei tamā i Samoa e faasoa mai lona tomai i lenei taleni faatusiata atonu e lē sapi ai o matou tagata faatauvaa i lenei taleni ua o matou maua.
“Aua ne’i galo ia i tatou le agalelei o nisi sa fesoasoani i le atinaeina o tatou tagata e ala i taleni ma tomai ua maua.”
Na faailoa ai e Peseta galuega a nisi ua iloga foi i lenei taleni i le atunuu sa aotauina e Coter.
