Ua aloaia nei le sui usufono filifilia o le itumalo o le Vaimauga 3 le afioga i le Faipule, Lautimu’ia Uelese Vaai, ina ua mae’a ona faatauto i le tauaofiaga a le Palemene i le Aso Lua.
O le mae’a o lea sauniga taualoa faapalemene na feiloai ai loa le afioga i le taitai o le vaega faaupufai o le Faatuatua i le Atua Samoa ua Tasi le afioga i le Tamaitai Palemia, Fiame Naomi Mataafa, o sui o le pati faaupufai ma le itumalo.
Na saunoa ai le afioga i le Palemia ma piiama i le saunoaga a le afioga i le Fofoga Fetalai, i le tāua o le tausisia e le faipule filifilia o amioga tausili ma o se faamanatu tāua foi lea mo faipule uma o le Faatuatua i le Atua Samoa ua Tasi.
O le mae’a o le saunoaga a le taitai ma le Palemia o le atunuu, na alo ai le itumalo i ana faaaloaloga na tatala ai ie o au’afa ma ie o moegalafo ma momoli foi le faafetai i le vaega faaupufai i le lagolago atu a o tapena lo latou sui i le palota laititi ua mae’a.
Ua 32 nei sui faipule o le vaega faaupufai a le faatuatua i le Atua Samoa ua Tasi ina ua ulufale atu le sui usufono o Vaimauga 3, o le nofoa sa manumalo ai le vaega faaupufai e puipuia aiātatau a tagata i le palota tele a le atunuu ia Aperila o le tausaga e 2021.
