O le tui puipui o le Koviti o le tali lea o le faamai, o le feau lea mai Isaraelu mo tagata Kiwi
Na maua le avanoa o le sooupu o le va I fafo a Isaraelu, Lior Haiat e fesootai ai ma le Newshub ananafi ma e le gata na talanoa I le aafia o Isaraelu I le Delta ae na ia fesoasoani mai ai foi ia Niu Sila ma le tulaga o iai
O le toatolu I totonu o le toalima o tagata Isaraelu o lea ua maea faia uma tui o le Koviti, ma I le saunoga a le sooupu ua aoaoina Isaraelu I le aoga o le tui a le Pfizer e tuumama ai le tigaina I le Koviti toe toalaiti ai I latou e moomia le auina atu I le falemai
Ua molimau ai foi Isaraelu o le toatele o o latou tagata na auina atu I le falemai o I latou e lei faia tui, ao I latou ua maea uma tui e lua faapea ai le tui lona tolu ua taua o le booster e itiiti le lamatia o le ono maua I le siama poo le oo atu foi I se tulaga tigaina tele
O Isaraelu o se tasi o atunuu na vave ona tapa I le tui lea e uma ane Fepuari o le tausaga nei ua afa ona tagata ua maea faia tui muamua ma o lea foi ua faasolo ana tui o le booster, faatusa ia Niu Sila e oo mai I le Lua o le vaiaso nei e tusa ma le 30% o ona tagata ua uma tui e lua
