Fai mai ua feagai nei pulega o fale faigaluega ma le tetele o tupe ua totogi e kava ai mo tagata faigalega ua ave aso ma’i e mafua mai gasegase.
O lipoti mai le leitio faavaomalo a Niu Sila ua ta’ua ai lea tulaag i le iuga o se suesuega na faia e le Southern Cross Health Society ma le Business NZ.
Ua faailoa ai i lea lipoti vaegatupe e faaalu e kamupani i le totogiina o taimi faapea e ave ai livi ma’i o tagata faigaluega ma maitauina ai le maualuga o le numera lea i le tausaga na tea nei 2022 pe a faatusa i tausaga i luma atu.
Ua iloa foi i lea lipoti o le ‘afa o ofisa poo faalapotopotoga sa faia iai le suesuega ua vaaia le siitia o le tulaga mafatia i tagata faigaluega stress, ma o faafitauli tau tupe lava le mafuaaga taatele.
E manatu i latou na faataunuuina le suesuega o se tulaga faanoanoa tele lea auā o tagata faigaluega o le aseta aupito tāua a soo se fale faigaluega ma e tāua tele le sologa lelei o lo latou soifuaga auā le faatinoina lelei foi o galuega.
