Talu ona faagasolo mai faiga filifiliga a le atunuu poo faigāpalota e filifili ai sui usufono o itumalo i faiga upufai i totonu o le Palemene, e lei aiaia lava faaletulafono le faaaogāina o tupe e sui tauva ma pati faaupufai i le taimi o faalauiloa poo faatosina.

O le tasi lea o galuega sa feagai ma le Komisi Suesue o faigāpalota ua i luma nei o le laulau a fono a le Palemene le latou lipoti.

I le fautuaga a le Komisi Suesue i le lesitala o pati faaupufai e pei ona feagai ma le ofisa o le komisi o faigāpalota lea galuega, e tatau ona faamauina manino tupe maua ma tupe faaaogā ma ia sueina e se suetusi i le mae’a o tausaga faaletupe ma lipoti atu i le ofisa o le komisi o faigāpalota faapea le Matagaluega o Alamanuia Pisinisi ma Leipa, lea o loo lesitala ai foi.

Ia teuteu le tulafono ma aiaia le $60 afe tala mo faalauiloa ma tapenaga a pati faaupufai mo se palota, ae 10 afe tala le maualuga o le seleni mo tapenaga o loo faalauiloa a se sui tauva.

Ua fautuaina foi ia lipoti atu e failautusi a pati faaupufai le faaaogāina o ia tupe i le ofisa o le komisi o faigāpalota, e lē gata i le faaaogāina o seleni a pati faaupufai ae faapea foi sui tauva.

Ua fautuaina foi ia faailoa e pati faaupufai tupe o foai latou te maua mai pisinisi ma le aulagolago e amata atu i le 500 tala, ae o sui tauva ia faailoa seleni e latou te maua ia latou aulagolago mai le 200 tala.

O le faaaogāina e pati faaupufai ma sui tauva o auala o fesootaiga televavave poo le social media ua iai foi le fautuaga e tatau ona faatulafono ma ia faasala vaega faaupufai ma sui tauva e lē usitaia ni aiaiga faaletulafono o le faaaogāina o ia auala o fesootaiga e pei ona i le vaaiga a le Matagaluega o Fesootaiga ma Faamatalaga tekonolosi.

Ua faailoa e le Komisi Suesue i le latou sailiiliga le tele o faafitauli sa matauina i le palota tele o le 2021 i le faaaogāina o ia auala o fesootaiga, ona ua lē gata ua taufaaleaga ai i sui tauva ma pati faaupufai, ae ua aafia ai ma le nofo lelei ma le nofo filemu o tagata.