O saunoaga faalaua’itele a faipule i le tala autu o le tupe sa fautuaina ai le sui usufono o Safata 1 e manaomia se faamaoniga o se vaega o lana saunoaga na afea ai le mataupu i se nofoaga o fefaatauaiga o oloa ma tupe poo le stock exchange, lea sa laumanuia mai i tala i luga o upega tafailagi le mae’a faalauiloa i Hong Kong o lea faiga tau pisinisi o loo ta’u ai le igoa o Samoa.
O le saunoaga faalauaitele foi a le sui faipule le afioga Lea’ana Ronnie Posini na ia faailoa ai ua mae’a sainia lea fuafuaga e se minisita o le Kapeneta.
Ae mo le silafia e le atunuu ua mae’a aumai i se tulaga faalauaitele i le ofisa o le Palemia se faamaninoga o lea mataupu, ma ua faailoa ai e lei faia iai se ioega poo ua talia foi e le Malo le gaioiga faapisinisi o se stock exchange.
O le tulai mai o lea vaega o felafolafoaiga a le Palemene i le sui usufono o Safata 1 ma le itu a le Malo na pasia ai se lafo faatu a le minisita o galuega tetele ma felaua’iga ina ia aveesea ia vaega o le saunoaga a le sui faipule o Safata 1 mai faamaumauga a le fono aoao faitulafono ona e leai ni faamaoniga.
