Ua talia e le Malo le fautuaga a le komiti faapalemene o tupe totogi sa iloiloina le lipoti faaletausaga a le Faalapotopotoga o Teugatupe faavaomalo a Samoa poo le SIFA, le Samoa International FinanceAuthority, ina ia faanatinati ni teuteuga o Tulafono a Samoa e mafai ai ona ausia tulaga manaomia faavaomalo, e aveese ai le igoa o Samoa mai le lisi uliuli poo le black list, a le Iuni o Europa.

Ua mafua ona iai pea le igoa o le atunuu i lea lisi uliuli ona o aiaiga a le Iuni a Europa i le faatinoina o galuega tau lafoga e le o ausia e Samoa, peitai o le faagaioia o galuega a lea pulega tumaoti a le Malo o loo ogatasi ma nisi o Tulafono ma faiga faavaomalo i le teu faafaigaluegaina i lo tatou atunuu o tupe a pisinisi ma kamupani i fafo.

Ua faailoa e le sui Minisita o Tupe le afioga Leota Laki Lamositele Sio, i le faailoaina i le Palemene o tali a le Malo i le lipoti, o loo ua faagasolo gaioioga talafeagai uma mo le foia o lea tulaga ina ia mulimulitaia ai e le Malo o Samoa faiga faavae ma manaoga o le iuni a Europa ina ia mafai ona aveesea loa Samoa ma le lisi uliuli.

O le lipoti faaletausaga a le SIFA mo le tausaga faaletupe 2019 i le 2020, ma le 2020 i le 2021 o loo faailoa ai se tupe mamā faasili poo se polofiti e silia i le 20 miliona tala.

O se tasi lea o faalapotopotoga tuma’oti a le Malo o loo fesoasoani malosi i le atiina a’e o taaloga i lo tatou atunuu, ma ua talia e le Malo le fautuaga a le komiti a le Palemene sa lauliliuina lea lipoti faaletausaga ina ia ave le faamuamua a le SIFA i le atina’eina o taaloga e pei o le lakapi ma le taaloga siisii uamea mamafa.

O loo faagasolo pea le talanoaina o lipoti a matagaluega ma faalapotopotoga eseese a le Malo i le toefaaauauina o fonotaga a le Palemene i lenei vaiaso fou.