E tusa ai o lipoti mai le vaega o aoaoga i le Matagaluega o Aoga Taaloga ma Aganuu e mai le 15 o atunuu o le Pasefika e aofia ai ma Samoa i le vaega oloo tele le faaletonu i le faitautusi tusitusi faapea ai ma le mataupu o le Matematika.

O le vaega faamamafaina e le Minisita o Aoga Afioga Seuula Ioane Tuaau i lana lauga i le taeao nei i le tatalaina o le polokalame o le faitautusi tusitusi ma faatinoga o vaega FaaSaienisi ma le Matematika i le Sone 2 i Upolu nei o le tulaga o le unaia o nei vaega o tulaga faaletonu ai alo ma fanau aoga mai i le Aoga Tulagalua seia paia luga i Kolisi maualuluga.

“E leo toe la ma le laina le lamatias o soo se vaipanoa o le soifuaga i gaioiga faasolitulafono ua oo lava i aoaoaga o le saoasaoa o le faatekonolosi ua iai nei ua ofi mai ai iina vaega ua matua lamatia ai le saogalemu o le ola aoaoina o fanau.”

“Ua autausaga o faatino nei polokalame ae oloo lagona lava sina iu leo itiiti e faapea o iai ea se suiga? o iai se aoga?”

O le agaga lava o le polokalame e pei ona faailoa e Seuula ina ia fesoasoani i fanau oloo vaivai i nei vaega e lifiina ai lo latou ola aoaoina.

“Ua nao se fautuaga ale Minisita male Matagaluega pe lei a’e se tofa, aisea e saga faatauva ai, e tauva lava nao e popoto ma lelei ae faapefea le lautele.”

“O lea manino mai i lipoti e faaletonu ma le pau maualalo o tulaga o iai a tatou faitautusi ma a tatou tusitusi pea faatusatusa i isi atunuu o le Pasefika.”

“Faimai tatou te tulaga fa mai i le pito i tua i atunuu e 15 o le Pasefika ae tatou te tulaga lua mai tua i le Matematika.”

“Oloo matua fesiligia ai lava e le tatou Malo pe ua mafua asiea ae aisea aua ua au tausaga.”

“O se tuualalo mai le auauna i Susuga i Puleaoga ma faiaoga amata mea tatou, fesili ifo poo saogalemu tatou e fua foi le saogalemu i le lelei o a tatou fuafuaga ma auala e tapena lelei ai ma ia taunuu i se taunuuga e le toe fesiligia ai tatou.”

E pei ona iai fuafuaga a le Malo i le tele o tausaga i suiga i nisi o auala e manuia ai le atunuu e faapena le ata faataitai na tuuina e le Minisita ina ia mafai ona timata ai galuega ma faatatauga a aoga taitasi aua fanau ma o latou lumanai.

“O fuafuaga e toefuatai ai le tautua ale Malo mo le atunuu e fai ma sui o le vaai atu lava e tumau pea e tatua ona fesuisuiai, e iloa le tautai i aso louloua aua e fua le fetuunaiga o la o lona sa i le matagi oloo feagai ai.”

O se faamalosi i matua na saunoa ai Seuula, “E fua foi le saogalemu i la outou pitolaau matua, o le tiai aoga soo i le faatausitama o fanau ma o faatau isi oloa i le auala tele ma le oo ai i le aoga o le lamatia lena o le ola taumafai o le tamaititi.”

Ua 13tausaga o faatino lenei polokalame lea na amatalia mai i le 2010 ona faaopoopo lea iai o le mataupu o le Matematika i le 2017 ma le Saienisi i le 2018 i le naunautaiga lava o le Matagaluega e fesoasoani e tali manao alo ma fanau ale atunuu i lo latou ola finafinau ae oloo taotaomia ona o nei vaega oloo agai ai le polokalame.