O le tina faanoanoa ia June Fina’i ua ia faasoa i tulaga mafatia i le uma ai o le ola o si ana tama 19 tausaga le matua Juith Tofilau Lafo Fina’i ona o se faalavelave tau taavale. 

I lipoti a le Samoa Global News na faailoa ai e June o le masina o Mati i le tausaga nei na faate’ia ai o ia ina ua ta’u atu ua aafia si ana tama i se faalavelave tau taavale ma ina ua taunuu atu i le falema’i na ia vaaia lana tama ua taoto mai ua lē toe minoi.  

E pei ona silafia o le faalavelave lea na aafia ai ni alii se toalua o Juith ma Aniseko Taofinuu. O nei alii e auso peitai o Juith na vaetama mai e June a o laitiiti lava o ia.  

Na tulai mai lenei faalavelvae a o feagai foi le aiga ma se tasi o latou maliu, o se tala faanoanoa e le’i faigofie ona taliaina e le tina ia June o se faalavelave na suia atoa ai lona olaga. 

Ua fautuaina ai e lenei tina avetaavale uma ina ia tautuana ia ave le taavale ma le faautauta ma le saogalemu ina ia mautinoa e lē tulai mai se faalavelave ma aafia atu ai ma isi tagata. 

E 7 masina o le a nofosala ai le alii 20 tausaga le matua lea na faafoeina le taavale na afua ai le maliu o Juith Tofilau Lafo Fina’i.