Ua toe tauaao nei e le tamā o Emelio Toalua ma nisi o taulelea o lo latou nuu o latou tusifolau, ina ua latou faia se sailiga ma toe feiloai ai ma le tamaitai na ave iai a latou seleni ma tusifolau i le faamoemoe e maua ai le avanoa e malaga mo galuega faavaitaimi i Ausetalia.

O le Aso Lua i le taeao na fesootai mai ai Emelio ma ia faailoa mai ata o le latou feiloaiga ma le tamaitai, lea na latou vili ai leoleo mo se fesoasoani.

O le feiloaiga lea e pei ona faamatala Emelio na fautuaina ai e Malu o le Malo lea tamaitai, ia toe faafoi tupe ma tusifolau. Ua maua la na o tusifolau ae o loo faatali le seleni.

Ua faailoa e lea tama o le tuualalo a leoleo, afai ae le toe maua atu a latou tupe o le avanoa lea e faatō’ai atu ai loa se faasea mo le faia o se suesuega faasaga i lea tamaitai.

O le faamatalaga a Emelio sa tutulu le mafine ma faatoese atu i le lē taunuu o le malaga na ia folafola e tuua Samoa i le Aso Lulu ua mavae, ma toe folafola e alu i le Aso Sa na tea nei ae e lei taunuu foi.

O le maualuga o le manaomia o tagata mai Samoa ma isi atunuu o le Pasefika i galuega faavaitaimi, ua tutupu ma aliali mai ai ma faiga taufaavalea i le sailia o tagata mo ia avanoa faigaluega.

E tolu afe isi avanoa ua folafola nei e Niu Sila o le a siitia ai le numera o tagata mo galuega faavaitaimi.