Ua fautuaina e le loia ua tauaveina nei le tali tetee a le leoleo asiasi ua faamalolo lē tumau e mafua i lona faia o se suesuega e aunoa ma le silafia e le Komesina o leoleo, le faaauau o le faamasinoga faaleoleo le Police Tribunal e suesue ai moliaga e fā, o le avanoa e tali ai ma lē ua tuuaia.

Ua fautuaina foi le Komesina o leoleo le susuga Auapaau Logoitino Filipo e le loia o se King Counsel mai Niu Sila, ia faasolomuli i tua lana faaiuga e faamuta le taimi galue o le leoleo asiasi, ona e lē sa’o tuuaiga ma moliaga ua faia faasaga i le leoleo asiasi.

O le Aso Tofi o le vaiaso nei na mae’a ai le sefulu aso na tuuina atu e le Komesina i le leoleo asiasi ma le tamaitai leoleo taai lua o loo faamalolo lē tumau, e tali atu i moliaga ma tali atu ai foi i le faaiuga o le faamuta o le toe avea ma Malu o le Malo.

O loo i Ausetalia le Komesina o le matagaluega o leoleo, falepuipui ma le ola toe fuataina sa auai ma le Minisita o le matagaluega i le sauniga i le Aso Lulu o le vaiaso nei, na tauaao ai e le Malo o Ausetalia le vaaleoleo fou o le Nafanua III.