Fautuaina e Dr Serah Brown Ah Kau le tāua o le iai o se fomai a se aiga i Samoa

I le 12 tausaga o galue i le Matagaluega o le soifua maloloina i Samoa le tamaitai fomai o Dr Serah Brown Ah Kau, o le tausaga e 2020 na ia tuua ai lea auaunaga a le Malo, ae tapena le faatuina o sana lava tautua tuma’oti lea faatoa 3 nei vaiaso talu ona amatalia.

O le talitonuga o le tamaitai fomai e lei iloga ona manino ma malamalama o tatou aiga ma tagata i Samoa i le tāua o le iai lava o se fomai e gafa ma le vaaia o gasegase o tagata o se aiga.

Sa soifua a’e o ia i Niu Sila o loo ia silafia ai le tāua o lea tulaga, ma o lana mau foi lea o loo ave i o tatou tagata e tāua le iai o se fomai mo le aiga, e teu malu ai faamaumauga o gasegase e tāua ma aoga mo le talaaga o isi tagata o le aiga i le lumanai.

O lana tautua o se fomai tutoatasi ua galulue faatasi ai ma isi fomai o le atunuu o loo faia foi a latou auaunaga tuma’oti i le manulauti e tasi, ia ofoina le mea silisili mo le vaaia o le soifua maloloina o tagata i Samoa.

O Dr Serah sa soifua a’e i Niu Sila ma o le atunuu foi lea na tele ina aoaoina ai, ae peitai sa malaga mai lo latou aiga i Samoa mo nisi o fuafuaga ma ulufale ai i le Kolisi o Samoa, ma faaiuina i le ulufale i le Iunivesite aoao a lo tatou atunuu na maua ai lona avanoa sikolasipi e aoga ai faafomai i Fiti.