Ua tu tu aai leoleo e pue ma taofia soo se tamaititi a’oga e mautinoa ua latou soli le tulafono o le faatupu vevesi, e pei ona molimauina e le tulai mai pea o vevesi i le taulaga ua aafia ai nisi o fanau a’oga.
Ua faailoa e le Matagaluega o Leoleo, Falepuipui ma le Ola Toefuataina, e ao i le mamalu o le atunuu ona galulue faatasi e ala i le logoina atu o ni vaaiga o loo faatupu ai ni vevesi i nofoaga faitele ae o loo aafia ai fanau a’oga.
O nisi o ia vevesi sa molimauina i ni ata pue i telefoni feaveai ua salalau i luga o le api o foliga, ma o loo vaaia ai nisi o fanau a nisi o kolisi i le taulaga o loo latou faia ia tulaga.
Ua faaalia e se molimau mai le ofisa autu o leoleo, e iai fanau ua taofia ma molia i vevesi sa tulai mai i le vaiaso na tea nei.
