O polokalame o faafiafiaga o le 60 tausaga o le Tutoatasi sa faatino i le vaiaso muamua o le masina na te’a nei o Setema, ua lipotia le maualuga o tupe faaopoopo na faaalu ai mo meaalofa na tuuina atu e le Malo i a’oga ma ekalesia faapea nisi o itumalo, sa lautogia e faia faafiafiaga ma pese faaleaganuu, o pesepesega faaleagaga, o le polokalame o le tutoatasi muamua na faia i Savaii, ma le taligamalo na faaaoga ai le faletalimalo o le Amoa Resort i Salafai.
Ua lipotia e le nusipepa o le Sunday Samoan se fautuaga mai le Matagaluega o Tupe a le Malo i se lipoti sa tuuina atu i le Sui Palemia sa avea ma sui Minisita o Tupe, e tatau i le Kapeneta ona fua se tapu i le faatulaga lea o se fua e laugatasia ai le aofaiga o tupe faaalu i meaalofa mo polokalame o le tutoatasi, e le gata i le 12 masina o loo faagasolo ai polokalame o le onosefulu tausaga, ae o le lumanai.
E 600 afe tala sa faamaonia mo polokalame peitai o le maea o le vaiaso muamua o Setema na faagasolo ai faafiafiaga i Upolu, ma faafiafiaga i Savaii na faamauina ai ua iai tupe ua sili ai le faaaoga nai lo seleni na pasia mo lea faamoemoe taua o le atunuu.
