Ua taunuu i le Komesina o le Matagaluega o Leoleo, Falepuipui, ma le Ola Toe Fuataina le taunuuga o le iloiloga faaletulafono i le taunuuga o suesuega a leoleo i le tagi a le Minisita o Galuega Tetele ua tuuaia ai le taitai o le pati faaupufai e puipuia aiātatau a tagata i le faia o ni saunoaga taufaaleaga.
O le fautuaga a le Loia Sili le Susuga Su’a Hellene Wallwork, ia toe tuu tuu i le loloto suesuega i nisi o vaega o le tagi, ae ua le mafai e le Komesina ona ia faailoa poo a tonu ia vaega.
O le fautuaga a leoleo i le mae’a o a latou suesuega na tuuina atu ai le faila i le Loia Sili mo lana iloiloga faaletulafono pe ua tatau ona faia ni moliaga faasaga i le susuga Tuilaepa L Sailele Malielegaoi, peitai la o lea na faailoa mai e le Komesina le fautuaga ua toe tuuina atu e le Loia Sili.
Na toe tuliloa le afioga i le Komesina i se fesili a se tasi o tusitala, pe moni nisi o lipoti ua faalele e faapea ua faia se fautuaga a le Loia Sili e teena ai le faia o ni moliaga, peitai na tali le alii Komesina, e leai se fautuaga faapena na avatu e le ofisa o le Loia Sili sei vagana ai ina ia toe faamae’ae’a lelei a latou suesuega i le mataupu ona toe lipoti ane lea i le ofisa o le Loia Sili.
O le toe suesueina e leoleo o ni mataupu i ni tagi o tala taufaaleaga ua toe avanoa ina ua toe faaofi i le Tulafono o soligatulafono poo le Crimes Act ae na aveesea i ni tausaga ua tuanai, ua manatu le Komesina o se tulaga ua tatau ona toe silasila iai i le lumanai, ina ia ave sa’o tagi faapea e tagofia e le faamasinoga o mataupu tau i aitalafu ma isi ituaiga o mataupu e le o ni solitulafono le Civil Court.
Le Komesina o leoleo, falepuipui ma le ola toe fuataina, susuga Auapaau Logoitino Filipo.
Mo le silafia o se tasi o mataupu na suesueina i ni upu lafo ua faaleaga ai se tagata lea na molia ai se tagata faasalalau e faamautu i Ausetalia, na togi i fafo ma le mafai ona faamaonia ona o le vaivai o mau na tuuina atu e leoleo i le faamasinoga.
O loo loma foi i le masina fou o Mati le faamasinoga o ni moliaga faapea o se tamaitai Samoa e faamautu i Amerika, o loo taofia lona tusifolau e le mafai ona toe foi, seia vagana ua mae’a lona faamasinoga.
O se tasi o mataupu ua mae’a ona suesueina molimau ae o loo tālia le faaiuga talu mai le tausaga na tea nei, o moliaga o se tamā sa galue o se leoleo o le Malo.
O lea moliaga o lona faia o ni faamatalaga i se polokalame a se tasi o faletelevise i lo tatou atunuu, na tuuaia ai se tamalii sa avea ma faipule o le Palemene i ni amioga na aafia ai se tamaitai leoleo.
