E silia i le 900 tagata palota o le itumalo o Faleata 4 e lei faatinoina le latou aiātatau o le faia o a latou palota, i le palota laititi a lea itumalo na toe faia i le tausaga na tea nei, lea na toe filifilia ai lo latou sui faipule le tofa Ale Vena Ale.

Ua faailoa e le sui faipule i lana itulau i le upega tafailagi le Api o Foliga poo le facebook, ua faasolo ona tufa atu tusi a le Komesina o faigapalota ua logo ai tagata palota o lona itumalo ua faasalaina ona o le lē palota.

O le mafuaaga lea o lana faasilasilaga i luga o le api o foliga ua logo ai i latou uma ua maua ia tusi, ina ia totogi a latou sala tupe.

“Faamolemole totogi lau sala e ono molia ma loka ai e leoleo”, o le fautuaga lea a le sui faipule i tagata palota o lona itumalo e lei palota i le palota laititi.

O lea foi faasilasilaga a le tofa Ale Vena ua faailoa atu ai i lona itumalo le amata o tapenaga mo fuafuaga o le faasoaina o le isi miliona tala o le a maua mo le atinae o itumalo palota.

Ua logoina ai aiga ia faaoo atu uma talosaga mo pili o fanau i le Iunivesite Aoao o Samoa, ona ua maua le faaaliga o le aso 8 o le masina nei o Mati e faamuta ai le taimi e totogi ai pili o fanau i le Iunivesite a le atunuu.

O nisi o fuafuaga a Faleata 4 mo lana miliona tala lona lua, o le totogiina lea o pili o tagata palota uma o le itumalo ua aafia fatuga’o ma ua faamamā o latou toto.

“Ua tuuina atu nei lo’u manaoga i le Komiti Faafoe o le polokeki ina ia totogi uma pili i le Falema’i Faamamā Toto mo outou uma ua maua i lea gasegase”.

O le amataga o le tausaga nei na faailoa ai i lipoti le siitia ai o le totogi mo le togafitiga o fatuga’o i le tatou falemai faamamā toto i Motootua ma Tuasivi.

Ua aofia ai i le siitaga ma le totogi e faamamā ai toto o tagata e malaga mai fafo e lē o ni sitiseni poo tagatānuu o Samoa.