Ua ave le tuualalo a le afioga Vui Clarence Nelson o le faamasino sinia o le Faamasinoga sili a Samoa, i le tatau ona talia e lo tatou atunuu o le feagaiga faavaomalo le Budabest Convention ma le Losarotte Convention o loo lisi ma faamatala ai ituaiga eseese o solitulafono e mafua mai i fesootaiga televavave faaonapo nei o loo maua i upega tafailagi poo cyber crimes.

O le tuualalo a le faamasino sinia na faailoa i lana folasaga i le tatalaina o le vaiaso o faatalanoaga i mataupu tau solitulafono i luga o upega tafailagi, ma le faamoemoe o le a mafai ona saili ai ni auala e fofo ai ia solitulafono ua faamaonia le aafia ai o tagata lautele ma fanauiti.

O le saunoaga a Vui na ia faailoa ai i le toatele o loo auai i lea fonotaga le ogaoga ma le tuga o nisi o solitulafono ua oo atu i le faamasinoga a Samoa, ua aafia ai tupulaga talavou ma fanauiti o loo mu’amu’a le ola tuputupu a’e ona o fesootaiga i upega tafailagi ua fanau mai ai le tele o mau solitulafono.

O le tāua o ia feagaiga faavaomalo e lua e pei ona faailoa e le Faamasino sinia o le faamasinoga maualuga, o loo faamatala mai ai ma auala e aoaoina ai fanau ma tagata lautele i gaioiga e taofia ai le faaaogaina o ia fesootaiga i ni taumafaiga e faatupu ai ni solitulafono.

O le Minisita o Fesootaiga ma Faamatalaga Faatekonolosi le afioga Toelupe Poumulinuku Onesemo sa ia tatalaina le fonotaga o le Cyber Smart Samoa, ma ia faailoa ai le tāua o le galulue o tagata uma aemaise o le Atoa o Samoa, e mataitu le puipuiga malu o tamaoaiga o atunuu, faamatalaga feaveai, le saogalemu o tagata aemaise o fanau mai gaioiga solitulafono a isi tagata e faaaoga ai fesootaiga televavave faaonapo nei.

O loo auai sui o auaunaga tau fesootaiga mai le faigamalo tuaoi o Amerika Samoa i le fonotaga faapea sui o faalapotopotoga eseese o loo lotolotoi i galuega ma tautua tau fesootaiga