O le faalapotopotoga a le malo o Iapani le JICA poo le Japan International Cooperation Agency, ua fa’aauala mai ai se fesoasoani e tusa ma le 48 miliona tālā o le a fausia ai se nofoaga mo a’oa’oga o tomai faasoifua mālōlōina ma su’esu’ega fa’asaienisi i totonu o le Iunivesite Aoao o Samoa.

O le Aso Lulu na aloa’ia ai le faatinoina o lea galuega i le suaina o le ‘ele’ele i le fanua o le Iunivesite a le atunu’u o le a fausia ai lea nofoaga. O se fesoasoani ua faamautū ai le galulue faatasi o le Malo o Iapani ma le Malo o Samoa e pei ona sa faamauina i se maliega na sainia ia Fepuari o le tausaga e 2024.

Advertisement

E pei ona silafia ua lata nei i le 30 tausaga o le osiga feagaiga a le Iunivesite Aoao o Samoa ma le Malo o Iapani na latou faatupe le fausia o le Iunivesite i le nofoaga o le Le Papaigalagala, ma na sosoo lea ma le fesoasoani foi o lea malo i le faatūina o le nofoaga o a’oa’oga fa’aauau le Polytechnic lea na tu’u faatasia ma le Iunivesite i le tausaga e 2006.

O le suaina o le ‘ele’ele mo le amatalia o le galuega, na auai le Palemia o le tatou malo, o le sui o le Malo o Iapani faapea ma le pulega o le Iunivesite Aoao o Samoa.

O le galuega o le nofoaga mo a’oa’oga o tomai faasoifua mālōlōina ma su’esu’ega faasaienisi o se tasi o fuafuaga sa faamautū i le fono lona iva a le PALM o se faatasiga e fono ai Ta’ita’i o malo o le Pasefika ma le Ta’ita’i o le Malo o Iapani sa faia i le tausaga e 2021.