Ua silasila le faigamalo fou i se isi atinae e faaaoga iai le vaega eleele poo se fanua o le Faalapotopotoga Eleele a Samoa i Sogi. 

O lea nofoaga na tapena muamua e le faigamalo tuai sa iai ma le fuafuaga e fausia ai se maketi mo pisinisi laiti lea na faagaioia i le nofoaga sa iai le maketi i Savalalo.

O le a lē taunuu le fuafuaga lea a le Mālō sa iai i le faaogaina o lea eleele ina ua toe finagalo le malo ua iai nei e faaaoga pea Savalalo e fausia ai se maketi fou ma faaauau ai pisinisi laiti na faaaogaina le nofoaga. 

Ua faailoa e le tamaitai Palemia Fiame Naomi Mataafa i le fono ma tusitala ua faa talanoa nei ma le malo o Niu Sila le faatupeina o le maketi fou i Savalalo o se nofoaga e afea gofie e tagata lautele auā o loo iai le nofoaga faatali pasi ma nisi o pisinisi e mafai ona tosina atu iai le toatele e afea lea maketi fou pe a oo ina maea ona fausia ma tatala mo pisinisi laiti.

E pei ona silafia o le maketi lea i Savalalo ua silia nei 5 tausaga talu ona aafia i le afi tele i le masina o Ianuari 2016 lea e tele pisinisi a aiga na aafia ai. I le maea ai o le pagatia i lea mū tele na fausia ai lona se nofoaga mo le tau toe amata o pisinisi lavalava, mea taulima faapea meataumafa a aiga na iai muamua ao tālia ai se nofoaga lelei e faamautu ai.

O lea la ua manatu le Mālō ua iai neie toe fausia lelei o le maketi i Savalalo mo pisinisi laiti ae tuu le nofoaga i Sogi mo se isi atinae.