Ua lipotia mai nei le fausia e Rusia o ituaiga muamua o ni meatau faaniukilia ua faia faapitoa e faatupu ai se galulolo e mafai ona aafia ai gataifale o atunuu.
O nuclear warheads lea e faaigoa o Poseidon ua gaosia nei, o torpedo ua faia i faiga faaonaponei e mafai ona faatupu ai se galulolo poo le tsunami i nofoaga tumatafaga e pei ona lipotia e le aufaasalalau mai lea atunuu.
Ua ta’ua o ia ituaiga auupega e mafai ona fana mai vaamaulu faaniukilia.
O le 2018 na muai faailoa ai e le peresetene o Rusia o Vladimir Putin o le Poseidon o se auupega aupito malosi lea a lona atunuu ma o vaamaulu foi o le a faaaogaina e fana mai ai ia auupega, e ese foi lea ituaiga e ta’ua o le Belgorod o ituaiga vaamaulu uumi.
O se mataupu ua agai iai ni manatu faaalia o tagata i le vaiaso nei i Ausetalia e ao ona silasila iai atunuu uma ona e telē se aafiaga o ia ituaiga auupega pe a osofaia ai soo se atunuu aemaise foi i le Pasefika.
