O se alii mai Melepone lea ua molia nei i le fasiotia o lona uso ma le faaoolima i lona tina.

Fai mai lipoti lata mai o lea alii 32 tausaga na pueina mai i se vaega pisi o le auala i Preston i le aso ananafi ina ua maua atu lona uso e 29 tausaga ua maliu ma si ona tina 62 tausaga o loo manua i se fale i Reservoir. 

Lipotia e le 9News o le uso o lē ua molia sa taumafai e momo’e agai i se falemai mo se fesoasoani ina ua osofaia e faaaoga ai se naifi tulou, peitai na matapogia ma iu lava ina maliu ai.

O se faalavelave na tumutumu atu ai leoleo i le fale lea i lea faaitu ma sa umi foi se taimi sa faataututu ai ma leoleo ae faatoa iloa ua sola ese.

O le taeao analeila na faamautu ai loa moliaga a leoleo i lea alii, o le fasioti tagata ma taumafai e fasioti ma o loo taofia i le taimi nei e tālia ai le taimi e tulai ai i le faamasinoga. 

Na faamatala e tuaoi o lea aiga o ni tagata e galulue malosi ma o se aiga lelei foi ma faauo atu i tuaoi ma o loo faaauau pea nei suesuega i lea mataupu.