Ua fai aso fiafia o le kerisimasi ma le tausaga fou i le toese i Tanumalala se alii talavou ua faasala e le faaasinoga maualuga i lona ioeina o moliaga o le umia o nakoti le laau faasāina o le maruana, ma lona faaoolima i ni alii leoleo se toalua.
O le masina o Oketopa i le tiute a leoleo tietie uila vilivae na latou afea ai le fale kalapu o le 75 i Sogi, lea na alu ane ai i fafo o le fale kalapu le alii o Opetaia Isaako Tupivao Siliva ua onā, ma agai atu i le vaega o tutu ai uila vilivae a Malu o le Malo ma ia tago ai i se tasi o uila.
Na fai iai le leoleo e alu ese, ae na faalii ai o ia ma ia kola le ofu togiga o le leoleo ma faaleagaina ai.
Na ave i le ofisa o leoleo ma tau faafillemu ai, ae na maua ai le avanoa o Opetaia e kiki ai le fofoga o se tasi o leoleo lea na ave i le falemai ma maua ai ana fualaau tui e tau togafiti ai lona manu’a.
Na sueina ai lona tino ma maua ai se lala ma ni lau maruana i le taga o lona ofuvae.
E 12 masina na amata ai le fua o se faasalaga, ae na toesea nisi masina ona o lona ioeina vave o moliaga ma ua nofosala ai mo le valu masina.
I le faamasinoga maualuga lava o se alii 27 tausaga le matua na latou osofai ma nisi taulelea talavou se toaono le ofisa o le Kolisi maualuga o Robert Louis Stevenson ma aveesea ai i se gaioiga solitulafono le moa vao a le aoga, o agaese o ni sapelu se lua, lua paelo vali ma le ili afi.
O ia meatotino na latou faatau i se tagata ae na toe maua uma i sailiga ma suesuega a leoleo.
Na ioe le alii o Sosene Asomaliu i moliaga ma ua nofosala ai i le falepuipui mo le 14 masina.
O isi taulelea na molia faatasi i latou o loo suesueina e le faamasinoga o tupulaga talavou o latou moliaga e mafua i le matua o o latou tausaga.
