I a Mati o le tausaga e 2021 na tupu ai le faalavelave tau taavale ise vaega o le aualatele ua ta’ua o le cross island road, lea na oso ai i tua se loli lau uta mamafa sa ave ai se masini uapato poo le excavator, ma lavea ma maliu ai se tama a’oga o le kolisi o Avele e 14 tausaga le matua.
O le aso Tofi na tea nei na faatoa lau ai le faaiuga a le faamasinoga faasaga i a Rudolf Nauer 24 tausaga le matua o ia sa aveina lea loli lau uta mamafa. Ua nofosala o ia ile falepuipui mo le umi e 2 tausaga ma le valu masina, ose faasalaga na amata mai le fua ile lima tausaga faafalepuipui.
Ae na toesea isi masina ona o itu lelei faasino i le ua nofosala, aemaise o lona ioeina o le moliaga o le ave taavale faatamala na mafua ai ona maliu se tagata le negligent driving causing death.
O le isi itu lelei mo Rudolf Nauer sa tuuina atu e lona aiga le sefulu valu afe tala ile aiga o le na maliu mo tapenaga o le lauava ma le tuugamau.
Ae ile faaiuga tusitusia a le afioga ile tamaitai faamasino o le faamasinoga sili le afioga Niava Mata Keli Tuatagaloa, o loo faaalia ai sa molia muamua e leoleo le ua nofosala ile moliaga o le fasioti tagata paivalea ona ose faalavelave tau taavale, ma moliaga o le leai se laisene e nate tauaveina ai se loli lau uta mamafa, ma e lei laiseneina foi le loli e faamautu ai ua saogalemu atoatoa mo le fealuai ile aualatele.
Na alu alu taualumaga o lenei mataupu faaui i tua e leoleo moliaga uma ae totoe nao le moliaga o le ave taavale faatamala ua mafua ai le maliu ose tagata, peitai na toe avatu foi moliaga muamua ma toe molia ai le ua faasalaina.
O Iulai o le tausaga nei na toe oo atu ai leoleo ile faamasinoga ma toe ave i tua moliaga e fa ae ioe ai loa Rudolf ile moliaga e tasi ua nofosala ai nei ile falepuipui. E 3 tausaga ua faasa ai e le faamasinoga ona toe umia e le ua faasalaina se laisene ave taavale.
