E lima tausaga ua falepuipui ai se alii sa tuua’ia i lona osofa’ia o ni malu o le malo i se faalavelave na tula’i mai i Brisbane.

Ua ta’ua i lipoti o Paul Gali 32 tausaga na ia ioeina ona moliaga i le Faamasinoga Faaitumalo i Brisbane i le aso ananafi ae o le faalavelave na tupu ia Me o le tausaga na te’a nei.

O loo molia i le faaoolima faamoemoeina ma le osofa’ia o se malu o le malo.
Fai mai le loia a le Crown, Melissa Wilson e pei ona lipotia e le 9News, na valaau ane leoleo i le fale o le tagata lea i Rothwell i le itu i Matu o Brisbane i le aso o le faalavelave ina ua lipotia lona faafefe o nisi o lona aiga i se naifi.

Na maua lelei i meapu’eata e faapipii i laei o leoleo le taimi na faatonu ai e leoleo lea alii e tuu i lalo le naifi ma le taimi na ia osofa’ia ai leoleo a o taumafai le isi e tuu i lalo lana fana ae faaaogā le taser.

O loo maua ai foi ma le fai ane o le alii lea i leoleo e fana ia peitai sa tumau pea le faai’uga a leoleo e le’i faaaogā ai a la fana ae osofa’i ai loa e lē ua molia le isi malu o le malo ma afaina ai lona tau’au.

Puna o Faamatalaga: https://www.9news.com.au/national/man-jailed-for-stabbing-police-officer-who-put-gun-away/fad09579-b126-44f0-b969-84db37511a41